لو مش عارفة تذكرى.........مش عارفة تنظمى وقتك

ازيـــــــكم يا قمرات ؟
وأخبار الدراسة معاكم ايه ؟

ربنا معاكوا يارب وتحققوا كل اللى بتتمنوه

بقالى فترة كل ما بدخل القسم بلاقى المشكلة دى متكرره
وكتير منكوا بيشتكى منها
( أزاى انظم وقتى ؟ ,, مش عارفة أذاكر خالص ,, بشوف الكتاب عفريت قدامى ههههه وغيرها كتير )
وبما انى عديت مرحلة ابتدائى
وبقيت فى اعدادى
وماكنتش عارفة طريقة المذاكرة الصحيحة

فعلاً بتكلم جد ...
انا معرفتش الطريقة الا لما دخلت اعدادى
بصوا بقى براحه كده نبتدى سوا

كلنا تقريبا بننقسم فى مذاكرتنا ل 3 أقسام :

القسم الأول بيحفظ الكلام زى ماهو .. مش مهم يفهم ولا لأ
ودول فى منهم بيبقوا ناجحين جداً على فكرة
يعنى كان معايا بنت بتحفظ بالكلمة والله بالكلمة
يعنى لو قالت (اذا) وهى مكتوبة (لو) تبقى غلطت والله ما بهزر
وفى مرة كنت بسمعلها حاجة لقيت اول ما الصفحة خلصت قامت قالبهالى
يعنى كمان حافظة نهايات الصفح
وطبعاً دى طريقة صعبة جداً ومملة وغير كده الكلام هيتحفظ وهيتنسى بعدها
يبقى ولا استفدنا حاجة .. صح ولا ايه ؟؟

القسم التانى بقى بيذاكر بصوت عالى ويلم عليه الناس ويفضل رايح جاى رايح جاى
وغالباً مش بيبقى فى تركيز
وبرضة اللى بيتحفظ بيتنسى هوا

اما القسم الثالث وده بجد أفضل طريقة شوفتها فى المذاكرة ودى اللى بعملها وجابت نتيجة الحمد لله

ببتدى اجيب مثلا الفصل الأول
اقرأه كله على بعضة كااااااااااااامل حتى لو فى اجزاء مش فاهماها
وبعد ما أخلص ابتدى اخد نقطة نقطة
يعنى عنوان وتحته تفصيل
اقرأ العنوان وابتدى افهم كل اللى تحته كويس أوووووووووى
أفهم مش أحفظ
وبعدين أجيب ورقة وقلم وأكتب العنوان واكتب تحته تلخيصى أنا
ايه اللى انا فهمته وطلعت بيه من قرأتى
والله يا بنات طريقة سهلة .. والكتابة بتسهل الحفظ والفهم .. ومش بنسى خالص لانى فاهمة مش حافظة وخلاص
وطبقت ده فى كل المواد والحمد لله كنت بنجح بتقدير
طبعاً زعلت انى ماكنتش بعمل كده فى مواد ابتدائى
ودى نصيحه ع الماشى أدخلى اللى تحبيه وسيبك من الناس لانى مشيت على كلامهم وندمت
طيب دى طريقة المذاكرة ..
نيجى للمشكلة التانية ودى كارثة بالنسبالنا ..
اللى هى مش قادرة اقعد على الكتاب
بشوفه بتعفرت ههههه
والأكل والشرب واى حاجة بتحلى وقت المذاكرة
حتى لو ماما قالتلك تعالى نفضى الشقة هتقومى جرى مع انك بتكرهى ده بس اهى اى حجه والسلام
المهم هقولكوا برضوا انا بعمل ايه ؟

اول حاجة لازم اصفى ذهنى وأطلع اى حاجة من دماغى بفكر فيها
احاول اهدى اعصابى شوية
وقبل ما تبدأى مذاكرة اولا اقرأى سورة طــه أو ياسين
او اى سورة زى ما تحبى
وبعدين صلى ركعتين لله بنيه ان ربنا يقويكِ
وروحى لماما قوليلها ادعيلى يا ماما ربنا يثبت المعلومات ويكون الموضوع سهل عليا
وياريت لو حد اتصل بيكِ تقولهم انك بتذاكرى وهتكلميهم لما تخلصى
لان الدخول فى مود المذاكرة مش سهل والله ولو خرجتى براه هتقعدى شوية على ما ترجعى تانى
وبعدين ادخلى الأوضة حاولى يكون مكان مذاكرتك ثابت ومنظم مش مكركب هاااا
وبلاش السرير ابوس ايديكوا
وياريت يكون مكان بعيد عن الريسبشين وصوت التلفزيون ولا يكون مكان كل شوية حد يدخل ويقطع تفكيرك
ولو بتحبى تشربى حاجة اعمليها قبل ما تبتدى هااااا بلاش تلاكيك

وقبل ما تبدأى قولى ( اللهم لاسهل إلا ماجعلته سهلاً وانت ان شئت جعلت الصعب سهلاً )
و ( اللهم اشرح لى صدرى ويسر لى أمرى وأحلل عقدة من لسانى يفقهه قولى )

وبالنسبة لتنظيم الوقت ..
فلازم تعملى جدول كل أسبوع
يعنى لو بترجعى من المدرسة الساعة 2
ممكن تتغدى وتريحى شوية وتقومى على الساعة 6 مثلاً تذاكرى لحد 9 او 10
وفى خلال الثلاث او الاربع ساعات ممكن تاخدى كل ساعة ,, ربع ساعة بريك ومش أكتر من كده
وبعدين تقعدى شوية على النت او اى طريقة بتحبى تريحى بيها
وبعدين تدخلى تنامى على الساعة 11
ولو بتاخدى دروس ممكن تذاكرى مدة أقل يعنى ساعتين فى اليوم مثلاً
بس تجمعى مذاكرة الأسبوع والمراجعة أيام الاجازة

بس كده بإذن الله كل حاجة هتكون سهلة بالنسبالك
وماتنسيش ان دعاء الوالدين اهم حاجة
اوعى تزعلى ماما وبابا منك خليهم دايماً يدعولك بصلاح الحل وان ربنا يرضى عنك
ويوفقك فى دراستك وحياتك
انا مش خبيرة ولا حاجة بس عديت بكل المراحل دى وياما عانيت وأكتئبت وعيطت كتير بسبب انى نفسى اذاكر ومش عارفة
ولما التزمت بكل اللى قولتلكوا عليه بجد لقيت نتيجه وفعلا الحمد لله ربنا كرمنى

أتمنى أكون أفدتكم ولو حتى بمعلومة واحدة

ودايماً بدعيلكم والله من قلبى
ماتنسونيش من دعواتكم أصلى مش عارفة اذاكر ههههههه
بهزر بهزر
بحبكم فى الله
واى سؤال انا معاكوا بأمر الله
مع تمنياتى للجميع بالتوفيق

بجد بجد بجد يا ندى انا مش عارفة اشكرك ازاى انا فعلا عديت بكل الحاجات دى وكنت بنهار من العياط وقلت خلاص مستقبلى ضاع وفعلا كنت بعمل كدة واشغل نفسى باى حاجة وبقعد اقول انا بضحك على نفسى والكلام ده والشيطان شاطر وبقالى حوالى شهر مبزكرش والامتحانات عالابواب والنت طبعا ايه يا حلاوته ليل ونهار وتهزئ بسببه مبقتش عارفة اعمل ايه وان شاء الله يا حبيبتى هعمل كدة وواثقة انها ربنا هيكرمنى فيها لانها كلها فيها طاعة لربنا اكيد سهلة والمزاكرة مش هتتنسى وكل حاجة
وجزاكى الله كل خير عالمعلومات
ربنا يخليكى لوالديكى يا روحى
بحبكم فى الله

مش عارفه اقول ايه اكتر من اللى قالته بسمه

والله يا ندة حلوووة اوى
بجد شكرا يا قمر شكرا جدا كل اللى بسمه قالته اقرايه تانى كأنى كتبته ماشى هههههههه

ربى يجعله فى ميزان حسناتك

يا رب اكون افادكوا لان دى طريقة مذكرتى وان شاء الله نجاح لكم

يا رب اسعدنى مرورك الطيب يا بسومة